Иеромонах Феофан (Арескин)

Канон св. патриарха Мефодия
из Чина Торжества Православия

Помещаемый ниже канон св. Феодора Студита, был переведен (по-видимому, впервые) и напечатан в Триоди Постной, изданной в Москве в 1656 г. На этом публикация этого замечательного канона в наших церковно-славянских Триодях по непонятным причинам прекратилась. Возможно, это вызвано трудностью и непривычностью исполнения канона русскими певчими во время процессии, а также тем обстоятельством, что упоминаемые в каноне еретики и так анафематствовались в Синодике, и не было нужды повторять анафемы ещё раз, к тому же таким малоизвестным на Руси лицам как еп. Феодор или Лизик. Великорусские архиереи до новой редакции Чина Православия 1766 г. продолжали использовать первое издание в Триоди Постной.

Уже давно атрибуция канона св. Феодору Студиту была подвергнута сомнению. В самом деле, приписывать канон, в котором речь идет об окончательном триумфе Православия и анафематствуются иконоборческие патриархи Феодот, Антоний и Иоанн Грамматик (смещен в 842 г.), св. Феодору, умершему в 826 г. - явный анахронизм. К настоящему времени в литургике установилось общее согласие ученых признать этот канон творением св. патриарха Мефодия. Впрочем, не исключено также, что св. Мефодий использовал древнейший субстрат, написанный самим великим студийским игуменом.

Канон св. Мефодия, как указывают рубрики, пели во время процессии к месту чтения Синодика Православия. Канон использовался лишь при патриаршем богослужении в св. Софии и был очень мало распространен за пределами Константинополя. К сер. XI в. он почти вышел из употребления, хотя иногда встречается в рукописях до XIV в. В широко распространенном Типиконе константинопольского монастыря Богородицы Эвергетиссы (сер. XI в.), который был перенесен на Русь, он уже отсутствует.

Живость, непосредственность, яркость, отсутствие типичных гимнографических штампов, свойственных произведениям этого жанра, резкость выражений отражают и огнепальный характер студийских ревнителей иконопочитания, в первую очередь самого св. Феодора, а также обрисовывают атмосферу радости и триумфа православных на знаменитом Торжестве Православия 11 марта 843 г. Вместе с каноном утрени, написанным св. Феофаном Начертанным, канон св. Мефодия составляет древнейший гимнографический пласт богослужения этого праздника.

Текст приводится по изданию: Триодь Постная (М., 1656 г.) л. 201 об.- 205.

В Неделю первую Поста

Подобает ведати, яко по отпусте утрени литию творим обще, со святыми древы крестными и честными иконы, отходяще на место отделенное, идеже подобает чести Соборное. Идущим же и возвращающимся нам поем настоящий канон, творение святаго отца нашего Феодора Студита, глас 6.

Песнь 1

Ирмос: Помощник и покровитель:

Благодарстьвенную песнь благодетелю Богу всех воспоим вернии, яко воздвиже спасенный рог, царство державное, православия поборника.

Явися воистину божественная благодать вселенней, слава и честь возсия, плещет Церковь, приемши одеяние своего обнажения.

Ризу Христову растерзанную от прелестнаго и отравотворнаго Иоанна прежде, божественнии отцы сшивше яве Церкви даша.

Господень зрак приемши Церковь, радуется и плещет с чады своими, яко победы почести приемши от него, православия знамение.

Да постыдятся убо и посрамятся прочее неистовнии Лизикс лютый и Антоний со Иоанном, и Феодор, обои отвратники веры.

Ааннiин и Иамврий, противившиися законоположителю древле Моисею, посрамишася. Ныне же лстивый Иоанн воистину с Антонием являются.

Ты растерзал еси, Христе, колесницу богоборец, и украшение подал еси Церкви Твоей, о ней же яко благ кровь Твою излиял еси.

Слава: Тя, Троице, благословлю и поклоняюся Твоей божественней державе, избави мя искушений всяких, в Тя бо верую Отца, и Сына, и Духа Всесвятаго.

И ныне: Царскою одеждею от тебе, Дево, Бог одеявся, явися человеком человекозрачен, сугуб по существу. Его же вид зрака в поклонении имамы.

Песнь 3

Ирмос: Утверди, Господи, на камени:

Веселитеся вси лицы отец и апостол, видяще поклонение икон, егоже яве предасте.

Доброту мою приях, и одеждею моею одеяхся, да вопиет всенепорочная Церковь, юже Иоанн совлече.

Постыдитеся, беззаконнии, еретическо глаголющии на Господа, воплотибося и явися во образе, егоже любезно целуим.

Скверная веления и беззаконная учительства Иоанна безумнаго кто изречет, нравы делфийския излагая.

Анафема Лизику, и Иоанну с Антонием, Феодору же безбожному и хульнику, вкупе Феодоту безумному.

Крови вопиют излиянныя, о божественном и плотоносном подобии Владыки, яже Иоанн излия.

Изгна Господь колесницу чюждих, и отдаде своя своим. Слава Его благости.

Слава: Безначальному хотению, и власти, и царству, Троице поклонимся православно, Ариа присно безславующе.

И ныне: Воистину Тя Владычицу исповедуем, Бога рождьшую, не внимающе глаголом Несториевым, но отеческим велением.

Песнь 4

Ирмос: Услышав пророк:

Радуйся Церкви и всякий граде и страно в веселии, да отверзутся ныне пустынная жилища, и девственнии да украсят ся мощи и изображения мученик достойно поклоняемы да будут.

Христос вас призывает, соберитеся ныне усердно, божественнии отцы, и зрение Его воплощения апостольски повествуйте, чюдеса и страдания, якоже пишет божественное Евангелие.

Соберитеся веселящеся множества иночествующих со дерзновением. Аще бо зле возмогут, паки побеждени будут окаяннии. И иже аще совет совещают таковии, расточит Господь.

Раны отец, крови язв оскудеша воистину, изгнания частая престаша, и мир всем водворятеся, не ктому возмогает кощуна баалства, Бог бо с нами есть.

Лоза злобы распростре рождия нечестия, и грозд горький процвете, и ярость змиина вино их. От него же людий Господних напоиша воистину мрачнаго злоумия.

Оскверниша Церковь Твою беззаконными рукоположении стяжаний ради, и правильно тии изметаются, и божественныя славы отпадошя Симон волхв, с сим Иоанн и лютый Антоний.

Зверей и богоборников, Антония сквернаго, и преступника Иоанна сатаномысленнаго, и церковнаго борителя, яко волков тяжких съшедшеся проклятых, вернии, возопиим.

Слава: Несозданное единоначалие, Отче, Сыне и Душе, Тебе поклоняемся: Егоже херувими многоочитии и серафими шестокрылатии поют вопиюще, свят, свят, свят еси, о Вседержителю вышний.

И ныне: Святых святейшая и всех вышшая тварей, едина явилася еси, Мати Дево, яко Самого рождьшая создателя Твоего. Темже святый зрак твой, Богородительнице, в поклонении имамы.

Песнь 5

Ирмос: От нощи утреннююще:

Христос победи да играет земля, преста молва, преста и плачь Христовых рабов, вера же всюду в мiре распространишася.

На икону зряще, распятие почитающе, любим лобызающе Христа и Того знамения, и покланяемся им не яко боги почитающе.

Дух многоглаголный и хулный Лизиков преста, глаголющий всегда, день от дне, на божественный зрак Христов, и святых.

Вскую, треокаянне, ненавидел еси изображение пречистое воплощения Христова и всех святых, не бо идолом глухим, вернии, покланяемся.

Нечестия органы суще, собрашя собор иереев нечестивых на Бога вышняго, якоже июдеи прежде, Анна и Каиафа.

В день суда всеокаянне, станет обличник безбожныя твоея души, собор отец, ихже безчисленными язвами обнажил еси телеса.

Церкви вся возопиют зовущия вси, лишеннии от тебе зрака Господня и святых Его, священных икон.

Слава: Всесодержащая державою Твоею, слава Тебе, слава Тебе, Триипостасная единице Отче, Сыне и Душе, надеющыяся на Тя избави всякого вреда.

И ныне: Яко златоукрашенный светильник Тя, Владычице, почитаем, свет умный рождьшую миру и мрачную бурю умаляющую, Дево.

Песнь 6

Ирмос: Возопих всем сердцем:

Возопиша бодрии хранителие Церкве Христовы, к Нему молящеся дати мир, и услыша и внят моление.

Изобличися лестнаго ловления отцев ученми, и Бог поется плотию изображенный, неописан Божеством сый.

Споспешницы прелести постыдитеся, и да погибнут вкупе с Антонием Феодот, и Лизик, и Феодор глубина погибели.

Уста твоя отверзл еси, окаянне, не в песнех духовных, но в хулах на твоего Владыку, отметая честное иконодействие.

Превратил еси отцев веления и апостольским учением, ино инако пиша, по своему чтилищу беззаконному, Иоанне христоборче.

Твой дым слез исполни благочестивых очи, но ветром божественных учителей расточися, суемудренный Иоанне.

Ты одежду божественную растерзал еси, якоже Арий прежде Христову ризу. Темже от Церкве далече отвержен еси, извержен быв якоже пес.

Слава: Едино начало славлю Божества в трех ипостасех, един бо Бог есть Отец, Сын и Дух, аще и разделяются начертанми и лицы.

И ныне: Пророчески, Чистая, богославный град явилася еси Божий, из негоже родися сам Творец твой, по рождестве Тя якоже прежде сохранив.

Песнь 7

Ирмос: Согрешихом:

Пещь ересей ныне угаси божественная благодать, палящая умных халдеов, и орошающая Троице служащия, четверогубными седмицами лет сию державшую.

Испестрися, облечися, удобрися Церковь, изображеньми Владыки всех воплощения и страстей Его, и знамения носящи, вконец по божественным законом.

Празднуйте, торжествуйте, христоименитии людие Господни, видящи Церковь и паки возсияющу, добротою божественнаго зрака, егоже Бог сый понесе яко человек, за еже спасти нас.

Нищетствова и алка и жада плотию Слово, сия человеческаго существа свойства, имиже описуется, сам же Божеством простый есть и неописанный.

Тайная и всескверная и душегубительная учения твоя кий язык исповесть, или проречения волшебства твоего, Иоанне лжеименне, и предтече антихриста сатаны.

Не подобаше тебе, о беззаконне, именоватися таковым нарицанием, но паче Пифагором, и Кроном, и Аполлоном, или некиим иных богов, ихже житию поревновал еси, наслаждаяся нечистот их.

Слава: Присносущней всесильней непостижимей Троице, вернии вси, Отцу, Сыну и Духу поклонимся, и богословствуим неслитно, взывающе: свят, свят, свят еси, Боже.

И ныне: Всепетая многославная Дево Мати Богородительнице, избави лютых согрешений чтущия Твое пречистое рождение, иныя бо помощи кроме тебе, Богоневесто, не стяжахом.

Песнь 8

Ирмос: Его же вои небеснии славят:

Пророчески радуимся и веселимся, вернии вси тайно, сей бо день, вонь же Христос славы Свое одеяние подаде Церкви.

Воинственно ополчишася на Христов зрак единодушно Лизикс и Иоанн, супруг велиаров, секирою злобы секуще Церковь.

Кто не восплачет великаго дерзновения, зря божественный зрак на медяных вратех полатных от мужей беззаконных камением биемый, учением Иоанновым.

Како не разумел еси, слепче всеокаянный, помраченный умом, поднебесную зря украшенную Христовым начертанием, но един имел еси мудрование иудейское.

Ты всеконечо разрушити мнел еси божественных церквей плотосияющий зрак Господень, и святых всех, но божественная благодать разруши твое мучительство.

Священным мощем святых и иконам их Лизикс лютый вкупе со Иоанном всячески не покланяются, рекоста: "беззаконно", отметники благочестия.

Слава: Вседетельно богоначалие почитающе, в начертаниии трех вси благочестно, безначальнаго Отца, собезначальнаго Слова, Духа сопросияющаго, прославим вовеки.

И ныне: Християном известный мост, похвала верных и прибежище, Владычице Богородице, Ты еси едина всем помогающи, и спасающи от бед.

Песнь 9

Ирмос: Безсеменнаго зачатия:

Языци плещите, лици отец потщитеся, постницы же и сущии в горах снидитеся, приидите, изгнании древле от лстиваго и злочестиваго Иоанна, обличити волхвования и чарования.

Веселися пустыне и вселенная вся, горы вся сладость искапите, холмы возрадуйтеся, яко Христос Слово мир даде сущим на земли, и божественным церквам соединение веры.

Бог отмщений ныне дерзостно глагола, Христос предста, укрепляяй днесь божественных учителей в дерзновении глаголати схождение Его, и воплощение, известно на иконе описоватися.

Долготерпеливе Господи, коль чюдна дела Твоя: кто изочтет человеколюбие Твое. Како зря убиваемыя ради образа Твоего священники Твоя и постники, не опалил еси лстивыя, но претерпел еси досаждаем?

Водрузивый недвижимую Церковь, Господи, и врата адова сея невозмогоша, Сам мир Твой подаждь людем Твоим, да Тебе вси чисте во едином славословии поклоняемся и славим.

Прокляти да будут нечтущии, Владыко, начертание плоти Твоея, прежде всех Иоанн вкупе со Антонием и Феодором, и злочестивым Феодотом и иными губителями веры.

Даяй мир твой апостолом, Владыко, и ныне подаждь тишину всем, собирая рукою твоею расточенныя, и якоже овци словесныя счисли ограде Церкви твоея.

Слава: Славлю Божество Отца, Сына и Духа, едино естество Треми ипостасьми, существо нераздельно, разделенное лицы, единоцарственное, вседетельное, всемощное совершенноначалие, содержащее всяческая.

И ныне: Всех помоще и покрове и заступление Богородительнице покажи, яко можеши молитися о всех, к тебе прибегающих, и отгониши злочестивыя силою Сына твоего яко Мати бо вся можеши.

© Опубликовано впервые на сайте храма Св. Елисаветы в С.-Петербурге 16.05.2004.
© Иеромонах Феофан (Арескин) — подготовка текста и предисловие.

 

 

 

 

купить семя и в Перми по выгодной цене
Hosted by uCoz